Hijar mein Khoon rulate ho

Hijar mein Khoon rulate ho, kahan hote ho?

Laut kar kion naheen aate ho, kahan hote ho?

Jab bhi milta hai koi shaks baharoon jaisa

Mujh ko tum kaise bhulate ho kahan hote ho?

Yaad aati hain akaile mein tumhari neendein

Kis tarhan khud ko sulate ho kahan hote ho?

Mujh se bichre ho tu mehboob e nazar ho kis ke

Aaj kal kis ko manate ho kahan hote ho?

Shab ki tanhai mein aksar yeh khial aata hai

Apne dukh kis ko sonate ho kahan hote ho?

Mausam e gul mein nasha hijar ka barh jata hai

Mere sab hosh churate ho kahan hote ho?

Sard raaton mein tumhein kaise bhula sakta hoon

Aag si dil mein lagate ho kahan hote ho?

Tum tu khushboo ki rafaqat ke liye bichre they

Abb agar ashk bahate ho kahan hote ho?

Shehar ke log bhi Wasiq yehi karte hain sawaal

Abb bohat kam nazar aate ho kahan hote ho?